భారత్ వేదికగా జరుగుతున్న 2023 వన్డే ప్రపంచకప్లో రికార్డుల మీద రికార్డులు నమోదవుతున్నాయి. తాజాగా ఢిల్లీలో జరిగిన ఆస్ట్రేలియా-నెదర్లాండ్స్ మ్యాచ్‌లో ఆసీసీ ఆట‌గాడు గ్లెన్ మాక్స్‌వెల్(Glenn Maxwell) చ‌రిత్ర సృష్టించాడు. 40 బంతుల్లోనే సెంచ‌రీ చేసి వన్డే ప్రపంచకప్ చ‌రిత్రలోనే అత్యంత వేగంగా శ‌త‌కం బాదిన ఆటగాడిగా రికార్డు నెలకొల్పాడు. ఈ క్రమంలో ద‌క్షిణాఫ్రికా ఆట‌గాడు మార్‌క్రమ్ రికార్డును బ‌ద్దలు కొట్టాడు.
వన్డే ప్రపంచకప్లో ఫాస్టెస్ట్ సెంచ‌రీ చేసిన ఆట‌గాళ్లు..
గ్లెన్ మాక్స్‌వెల్(ఆస్ట్రేలియా)- 40 బంతుల్లో (2023)
ఐడెన్ మార్‌క్రమ్(ద‌క్షిణాఫ్రికా)- 49 బంతుల్లో (2023)
కెవిన్ ఓబ్రియన్(ఐర్లాండ్ )- 50 బంతుల్లో (2011)
గ్లెన్ మాక్స్‌వెల్(ఆస్ట్రేలియా)- 51 బంతుల్లో (2015)
ఏబీ డివిలియర్స్(ద‌క్షిణాఫ్రికా)- 52 బంతుల్లో (2015)
ఓవరాల్‌గా వన్డేల్లో 31 బంతుల్లోనే సెంచ‌రీ చేసిన ఆటగాడిగా ద‌క్షిణాప్రికా దిగ్గజ ప్లేయర్ ఏబీ డివిలియర్స్ మొద‌టి స్థానంలో ఉన్నాడు. ఆ త‌ర్వాత స్థానాల్లో కోరె అండ‌ర్సన్(36 బంతుల్లో), షాహీద్ ఆఫ్రిదీ(37 బంతుల్లో) ఉన్నారు.
ఇక ఈ మ్యాచ్ విష‌యానికి వ‌స్తే.. తొలుత బ్యాటింగ్ చేసిన ఆస్ట్రేలియా జట్టు నిర్ణీత 50 ఓవ‌ర్లలో 8 వికెట్ల న‌ష్టానికి 399 ప‌రుగులు చేసింది. డేవిడ్ వార్నర్ (104; 93 బంతుల్లో 11 ఫోర్లు, 3 సిక్సర్లు) సెంచ‌రీ చేయగా.. మ్యాక్స్‌వెల్(Glenn Maxwell) (106, 44 బంతుల్లో 9 ఫోర్లు, 8 సిక్సర్లు) వీరవిహారం చేశాడు. వీరితో పాటు స్టీవ్ స్మిత్ (71), ల‌బుషేన్ (62)లు అర్థ సెంచ‌రీలతో రాణించారు. నెదర్లాండ్స్ బౌల‌ర్లలో వాన్ బీక్ 4, బాస్ డి లీడే 2, ఆర్యన్ దత్ ఒక వికెట్ పడగొట్టారు.
