మెగాస్టార్ చిరంజీవి హీరోగా భారీ అంచనాలతో ప్రేక్షకుల ముందుకు రానున్న సినిమా ‘విశ్వంభర(Viswambhara)’. ఈ సినిమా కోసం మెగా ఫ్యాన్స్ వేయి కళ్లతో ఎదురుచూస్తున్నారు. వశిష్ఠ దర్శకత్వంలో చిరంజీవి నటించిన సోషియో ఫాంటసీ ‘విశ్వంభర’కు తాజాగా ఓటీటీ సమస్య ఎదురైందని సినీ వర్గాల్లో చర్చలు జోరుగా సాగుతున్నాయి. 2025 సంక్రాంతి కానుకగా జనవరి 10 థియేటర్లలో ఈ మూవీని విడుదల చేయాలని మేకర్స్ ఫిక్స్ అయ్యారు. ఈ సినిమా బడ్జెట్ విషయంలో ఎక్కడా వెనకడుగు వేయలేదు మేకర్స్. ఈ మూవీ కోసం రూ.200 కోట్లు ఖర్చు చేయడానికి రెడీ అయ్యారు. దీంతో చిరూ కెరీర్‌లో అత్యధిక బడ్జెట్ సినిమాగా ‘విశ్వంభర’ నిలిచింది. ఈ సినిమా కోసం ప్రేక్షకులు భారీ ఆసక్తి చూపుతున్నా ఓటీటీలు మాత్రం ఆశించిన స్థాయిలో ఇంట్రస్ట్ చూపట్లేదట. ఈ సినిమాకు మేకర్స్ కోరినంత ఇచ్చేందుకు విముఖత చూపుతున్నాయన్న మాట వినిపిస్తోంది.
తెలుగు, హిందీ స్టార్స్ సినిమాలపై ఈ మధ్య ఓటీటీ సంస్థల ఆసక్తి కాస్త సన్నగిల్లినట్లే కనిపిస్తోంది. వీరి సినిమాలను కొనుగోలు చేసే విషయంలో ఓటీటీ సంస్థలన్నీ కూడా ఆచితూచి అడుగులు వేస్తున్నాయి. ఈ నేపథ్యంలోనే రూ.200 కోట్లతో తెరకెక్కిస్తున్న ‘విశ్వంభర(Viswambhara)’కు ఓటీటీ ఫ్లాట్‌ఫామ్స్ నుంచి రూ.40 కోట్ల ఆఫర్స్ మాత్రమే వస్తున్నాయట. అలా ఎలా కుదురుతుందని మేకర్స్ ప్రశ్నించినా అంతకు మించి ఈ సినిమాపై ఖర్చు చేయలేమని ఖరాఖండిగా చెప్తున్నాయని టాక్. పైగా మూవీ బ్యానర్ యూవీ క్రియేషన్స్ ఎంత అడిగి తమ ఓటీటీ లెక్కలు వేరేలా ఉంటాయని, ఒక ఓటీటీ సంస్థ ఒక సినిమాకు రేట్ ఫిక్స్ చేసేటప్పుడు ఆ సినిమాపై ఉన్న అంచనాలు, మార్కెట్ విలువ, తమ బడ్జెట్ వంటి మరెన్నో అంశాలను పరిగణలోకి తీసుకుంటుందని, ఆ ప్రకారమే ‘విశ్వంభర’కు ఈ రేట్ ఫిక్స్ చేశామని ఓటీటీ(OTT) యాజమాన్యాలు చెప్తున్నాయట.
