ఫ్యామిలీ డిజిటల్ కార్డులను(Family Digital Cards) వీలైనంత త్వరగా అందించేలా ప్లాన్ చేస్తున్నట్లు మంత్రి పొన్నం ప్రభాకర్ వెల్లడించారు. ఈ కార్డుల్లో కుటుంబాలకు సంబంధించి అన్ని వివరాలు ఉంటాయని, పెళ్ళి అయిన వారి వివరాలు , చనిపోయిన వారి వివరాలను అడిగితెలుసుకుని అప్‌డేట్ చేసేలా ఆదేశాలు జారీ చేసినట్లు కూడా ఆయన వెల్లడించారు. వన్ స్టేట్ వన్ కార్డ్‌లో భాగంగా ఈ కార్యక్రమాన్ని చేపట్టామని, దీనిని ప్రతిష్టాత్మకంగా ముందుకు నడిపిస్తున్నామని ఆయన చెప్పారు. ఈ కార్డుతో ప్రతి కుటుంబానికి ఎన్నో లాభాలు ఉంటాయని కూడా ఆయన వివరిస్తున్నారు. ఈ కార్డులో మహిళలే గృహ యజమానులుగా ఉంటారని, ఆ విధంగానే ప్రభుత్వం కూడా గుర్తించనుందని ఆయన తెలిపారు. ఈ ఒక్క కార్డుతోనే ఆరోగ్యం, రైతు బంధు, రైతు బీమా సహా తదితర పథకాలను కూడా పొందొచ్చని తెలిపారు. ఈ కార్డుల సర్వేను ప్రతి నియోజకవర్గంలో నిర్వహిస్తున్నట్లు ఆయన(Ponnam Prabhakar) తెలిపారు.
‘‘ప్రతి కుటుంబానికి గుర్తింపు ఉండేలా డిజిటల్ కార్డును(Family Digital Cards) సిద్ధం చేస్తున్నాం. ఇందులో ప్రతి కుటుంబానికి సంబంధించి అన్ని వివరాలు ఉంటాయి. ఒక్క కార్డుతోనే ప్రజలు అనేక ప్రయోజనాలు పొందగలుగుతారు. రైతు రుణమాఫీని కూడా పొందొచ్చు. ఈ కార్డు సర్వేను ప్రస్తుతానికి పైలట్ ప్రాజెక్ట్‌లా ప్రారంభించినా.. అతి త్వరలోనే దీనిని రాష్ట్రవ్యాప్తంగా ప్రధాన ప్రాజెక్ట్‌గా కూడా మారుస్తాం. అదే విధంగా కుటుంబీకులు అంగీకరిస్తేనే ఫ్యామిలీ ఫొటో తీసుకోవాలని అధికారులను ఆదేశించాం’’ అని కూడా ఆయన చెప్పారు.
