ఏపీలో ఎన్నికల వేడి తారాస్థాయికి చేరుకుంది. ఈ క్రమంలోనే టీడీపీ సీనియర్ నేత, మాజీ మంత్రి ప్రత్తిపాటి పుల్లారావు కుమారుడు శరత్‌ను పోలీసులు అరెస్ట్ చేయడం కలకలం రేపుతోంది. జీఎస్టీ ఎగవేతకు పాల్పడ్డారన్న ఆరోపణలపై మాచవరం పీఎస్‌లో ఆయనపై కేసు నమోదైంది. దీంతో విచారణ జరిపిన పోలీసులు శరత్‌ను అదుపులోకి తీసుకున్నారు. అయితే పోలీసుల తీరుపై టీడీపీ నేతలు మండిపడుతున్నారు.
- Advertisement -
చిలకలూరిపేట టీడీపీ అభ్యర్థిగా ఉన్న ప్రత్తిపాటి పుల్లారావును ఎన్నికల వేళ ఇబ్బంది పెట్టేందుకే ఇలాంటి చర్యలు చేపడుతున్నారని ఆగ్రహం వ్యక్తం చేస్తున్నారు. అధికార పార్టీ నేతలు పోలీసులతో కుమ్మక్కయ్యారని.. ప్రత్తిపాటి శరత్‌ను వెంటనే విడుదల చేయాలని డిమాండ్ చేస్తున్నారు. కాగా పుల్లారావు కుమారుడు శరత్‌కు చెందిన అవెక్సా కంపెనీపై 2020లో ఐటీ దాడులు జరిగిన సంగతి తెలిసిందే.
