ఎన్ని కఠిన చట్టాలు తెచ్చిన కామాంధుల ఆకృత్యాలు ఆగడం లేదు. పశువుల కోసం గడ్డి తీసుకొచ్చేందుకు అడవికి వెళ్లిన 55 ఏళ్ల మహిళపై నలుగురు యువకులు..సామూహిక అత్యాచారానికి పాల్పడ్డారు. ఉత్తర్ప్రదేశ్ గ్రేటర్ నోయిడాలో ఆదివారం ఉదయం ఈ ఘటన జరగగా ఆలస్యంగా వెలుగులోకి వచ్చింది.
పశువుల కోసం గడ్డి తీసుకొచ్చేందుకు మహిళ అడవిలోకి వెళ్లిందని, ఆ సమయంలో నిందితుల్లో ఒకరు అక్కడే పశువులకు కాపలా కాస్తున్నాడని బాధితురాలి భర్త ఫిర్యాదులో పేర్కొన్నారు. ఆ వ్యక్తి గంజాయి తీసుకున్నాడని చెప్పారు.
ఈ క్రమంలోనే అటు వైపు వెళ్లిన మహిళపై మరో ముగ్గురితో కలిసి అత్యాచారం చేశాడని వివరించారు. నిందితులందరూ మత్తులోనే ఉన్నారని డీసీపీ వృందా శుక్లా తెలిపారు. వీరిని అరెస్టు చేయడం కోసం ఓ బృందాన్ని ఏర్పాటు చేసినట్లు చెప్పారు. దోషులను విడిచిపెట్టేది లేదని స్పష్టం చేశారు. మహిళ ప్రస్తుతం ఆస్పత్రిలో చికిత్స పొందుతుంది. ఆమె ఆరోగ్య పరిస్థితి నిలకడగానే ఉందని పోలీసులు తెలిపారు.
