వివాహిత మహిళను లైంగికంగా కోరికలు తీర్చుకునేందుకు వేధించిన నేపథ్యంలో సంగారెడ్డి జిల్లా నారాయణఖేడ్ ఏరియా ప్రభుత్వ ఆసుపత్రి సూపరింటెండెంట్ డాక్టర్ నర్సింగ్ చౌహాన్ ను సస్పెండ్ చేస్తూ ఉత్తర్వులు జారీ అయ్యాయి. ఈ మేరకు తెలంగాణ రాష్ట్ర వైద్య విధాన పరిషత్ కమిషనర్ డాక్టర్ కె. రమేష్ రెడ్డి సస్పెన్షన్ వేటు వేశారు.
ఓ తండాకు చెందిన యువతి ఖేడ్‌ ప్రాంతీయ ఆసుపత్రిలో నర్సింగ్ ట్రైనింగ్ పొందుతోంది. ఆమె విధులు ముగించుకుని వెళుతుండగా సూపరింటెండెంట్ చౌహాన్ తన గదిలోకి పిలిచాడు. తొందరగా ఎందుకు వెళుతున్నావని ప్రశ్నించగా..బస్సు టైమ్‌ అవుతోందని చెప్పింది. ఆలస్యంగా పొదువులే గానీ కాసేపు నాతో మాట్లాడు కోరిక తీర్చు అంటూ..ఆమె వ్యక్తిగత విషయాలు అడగడం మొదలుపెట్టాడు. క్రమంగా ఆమె శరీరంపై చేతులు వేస్తూ అక్కడక్కడా అసభ్యంగా ప్రవర్తించాడు.
దీంతో షాకైన యువతి అతడి బారి నుంచి తప్పించుకుని వెళ్లి కుటుంబసభ్యులకు విషయం చెప్పింది. ఈ నేపథ్యంలోనే గురువారం యువతి కుటుంబసభ్యులు, గ్రామస్థులు నారాయణఖేడ్ చేరుకున్నారు. యువతితో నర్సింగ్‌చౌహాన్‌‌కు ఫోన్ చేయించి ఓ షాపింగ్ మాల్‌ వద్దకు రప్పించారు. అక్కడ వాగ్వాదం చోటు చేసుకోవడంతో అతడిని ఆస్పత్రి ఆవరణలోకి తీసుకొచ్చి అందరి ముందూ దేహశుద్ధి చేశారు.
అనంతరం బాధితురాలి ఫిర్యాదు మేరకు చౌహాన్‌ను సస్పెండ్ చేసిన ఉన్నతాధికారులు.. శుక్రవారం ఖేడ్‌ ప్రాంతీయ ఆసుపత్రిని సందర్శించి సమగ్ర విచారణ జరిపి నివేదికను అందించాలని జిల్లా ఆసుపత్రి సూపరింటెండెంట్ ని ఆదేశించారు. తదుపరి ఉత్తర్వులు వెలువడే వరకు డాక్టర్ రామకృష్ణ రాజుకు ఇన్ చార్జ్ సూపరింటెండెంట్ గా బాధ్యతలు అప్పగించారు.
