ఎన్టీఆర్, రామ్చరణ్ ప్రధాన పాత్రల్లో దర్శకధీరుడు రాజమౌళి తెరకెక్కించిన సినిమా ‘ఆర్ఆర్ఆర్’. ఇప్పటికే చిత్రీకరణ పూర్తి చేసుకున్న ఈ సినిమా సంక్రాంతి కానుకగా జనవరి 7న ప్రేక్షకుల ముందుకు రానుంది. ఈ నేపథ్యంలో చిత్ర ప్రచార కార్యక్రమాల వేగాన్ని పెంచారు. ఇప్పటికే విడుదలైన ఈ సినిమా పోస్టర్లు, గ్లింప్స్, ‘దోస్తీ’, ‘నాటు నాటు’, ‘జనని’ పాటలు అభిమానులను విపరీతంగా ఆకట్టుకున్నాయి.
ఇందులో భాగంగా తాజాగా ఈ మూవీలో ఎన్టీఆర్ పోషించిన కొమురం భీమ్ పాత్రకు సంబంధించిన కొత్త పోస్టర్ను విడుదల చేసింది చిత్రబృందం. అల్లూరిసీతరామరాజుగా నటించిన రామ్చరణ్కు సంబంధించిన కొత్త పోస్టర్ను నేడు సాయంత్రం 4 గంటలకు రిలీజ్ చేయనున్నట్లు ప్రకటించింది. డిసెంబరు 9న ఈ చిత్ర ట్రైలర్ను విడుదల చేయనున్నట్లు మరోసారి గుర్తు చేసింది.
ఆలియాభట్‌ , ఒలీవియా మోరీస్‌ కథానాయికలు. శ్రియ, సముద్రఖని, అజయ్‌ దేవ్‌గణ్‌ కీలకపాత్రల్లో కనిపించనున్నారు. ఈ చిత్రాన్ని డీవీవీ ఎంటర్‌టైన్‌మెంట్స్‌ పతాకంపై దానయ్య నిర్మించారు. కీరవాణి స్వరాలు అందించారు.
