బాలీవుడ్ భామ కంగనా రనౌత్(Kangana Ranaut)కు తన తాజా సినిమా ‘ఎమర్జెన్సీ(Emergency)’ చిక్కులు తెచ్చిపెట్టింది. ఇప్పటికే ఈ సినిమా విషయంలో అనేక ఫిర్యాదులు వస్తున్నాయి. ఈ సినిమా సిక్కు సమాజాన్ని కించపరిచేలా ఉందంటూ పలువురు పేర్కొన్నారు. కావున ఈ సినిమా విడుదలను నిషేధించాలని కూడా డిమాండ్ చేస్తున్నారు. తాజాగా ఈ సినిమా వ్యవహారంలోనే కంగనా రనౌత్‌కు మధ్యప్రదేశ్(Madhya Pradesh) హైకోర్టు నోటీసులు జారీ చేసింది. ఒక వర్గానికి చెందిన ప్రాథమిక హక్కులను ఉల్లంఘించేలా ఈ సినిమా చిత్రీకరణ జరిగిందని కోర్టు తన నోటీసుల్లో పేర్కొంది. కంగనాతో పాటు కేంద్ర ప్రభుత్వం, మధ్యప్రదేశ్ ప్రభుత్వాలకు కూడా హైకోర్టు నోటీసులు జారీ చేసింది.
అంతేకాకుండా ఈ సినిమాకు తెరకెక్కించిన మణికర్ణిక ఫిల్మ్స్‌, ఈ సినిమాకు సర్టిఫికేట్ ఇచ్చిన సెన్సార్ బోర్డుకు, జీ స్టూడియోస్, యూట్యూబ్, ఇన్‌స్టాగ్రామ్, ఫేస్‌బుక్‌లకు కూడా కోర్టు నోటీసులు ఇచ్చింది. ఇప్పటికే తన సినిమాను అడ్డుకోవడానికి ఎక్కడలేని ప్రయత్నాలు జరుగుతాయిన కంగనా రనౌత్ చెప్పుకుంటూనే వచ్చారు. ఈ క్రమంలో కోర్టు నోటీసులు రావడంతో ఈ సినిమా వాయిదాకు అవకాశం ఉన్నట్లే కనిపిస్తోంది. అంతేకాకుండా నోటీసులకు 24 గంటల్లో స్పందించాలని కోర్టు కోరినట్లు సమాచారం. ఈ సినిమా కేసు విచారణ నేడు జరగనున్న క్రమంలో కంగనా రనౌత్(Kangana Ranaut) ఏమని వివరణ ఇస్తుంది అనేది హాట్ టాపిక్‌గా మారింది.
