టాలీవుడ్ సీనియర్ హీరో గోపీచంద్ వివాదాలకు దూరంగా ఉంటారు. సెలైంట్‌గా సినిమాలు చేసుకుంటూ వెళ్తున్నారు. అలాంటి గోపీచంద్(Gopichand) అనూహ్యంగా చిక్కుల్లో పడ్డారు. ఆయన నటించిన రామబాణం(Rama Banam) చిత్రం వారంరోజుల్లో విడుదల కానుండగా.. ఆయనకు అనూహ్యంగా చిక్కులు వచ్చి పడ్డాయి. రామబాణం సినిమాలో ఐఫోన్ పిల్ల.. అంటూ సాగే ఓ పాట ప్రేక్షకులని బాగా ఆకట్టుకుంటోంది. ఇందులో నా ప్రాణం ఆగదే పిల్ల.. అనే లైన్ ఉంది. తాజాగా కరీంనగర్‌కు చెందిన గొల్లపల్లి రవీందర్ అనే ఫోక్‌ సింగర్‌ ఈ పాట తనదే, ట్యూన్ కూడా తనదేనంటూ మీడియాను ఆశ్రయించారు.
గొల్లపల్లి రవీందర్ ఈ పాటను 1992లో చేతికి గాజులు పిల్లో పాట రాశానని చెబుతున్నారు. అప్పట్లోనే ఆ పాటా బాగా హిట్‌ అయ్యిందని తెలిపారు. ఆ పాటలోని లైన్‌ను, తన ట్యూన్‌ని రామబాణం యూనిట్ వాళ్ళు తనకు ఎలాంటి సమాచారం ఇవ్వకుండా వాడుకున్నారని ఆరోపించారు. ఇప్పటివరకు ఆయన ఆరోపణలపై రామబాణం(Rama Banam) చిత్రబృందం స్పందించలేదు. కాగా, ఈ సినిమాలో గోపీచంద్ సరసన డింపుల్ హయతి జంటగా నటించింది. లక్ష్యం, లౌక్యం చిత్రాలతో ఆకట్టుకున్న డైరెక్టర్‌ శ్రీవాస్‌ ఈ సినిమాను తెరకెక్కిస్తున్నారు. జగపతి బాబు, ఖుష్బూ ప్రధాన పాత్రలు పోషిస్తోన్న ఈ సినిమా మే 5న గ్రాండ్‌గా రిలీజ్ కాబోతుంది.
