హనుమకొండ జిల్లా కేంద్రంలో ప్రముఖ దర్శకుడు రాంగోపాల్ వర్మ సందడి చేశారు. మాజీ ఎమ్మెల్సీ కొండా మురళి జీవిత చరిత్ర ఆధారంగా రాంగోపాల్ వర్మ తీస్తున్న కొండా బయోపిక్ షూటింగ్ కోసం హనుమకొండకు వచ్చారు. ఈ సందర్భంగా వర్మకు మాజీ ఎమ్మెల్సీ కొండా మురళి, మాజీ మంత్రి కొండా సురేఖ ఘన స్వాగతం పలికారు. వంచనగరిలో కొండా బయోపిక్ను ప్రారంభించడానికి వారు బయలుదేరారు. వర్మ రాకతో స్థానికంగా సందడి నెలకొంది. షూటింగ్ ప్రారంభంలో భాగంగా హన్మకొండ రాంనగర్ నుంచి వంచనగిరి వరకు బైక్ ర్యాలీగా కొండా అభిమానులు, కాంగ్రెస్ శ్రేణులు తరలివచ్చారు.
వివాదాస్పద చిత్రాలకు కేరాఫ్ అడ్రస్ రామ్గోపాల్ వర్మ. హారర్, ఫ్యాక్షనిజం, రౌడీయిజం నేపథ్యంలో ఇప్పటికే పలు చిత్రాలు తెరకెక్కించారు. ఈ సినిమాలు బాక్సాఫీస్ దగ్గర హిట్గా నిలిచిన మాట అటుంచితే..ఈ కథాంశాలతోనే వర్మ మరింత పాపులర్ అయ్యారు.
విజయవాడ రౌడీయిజం నేపథ్యంలో సాగే ‘రక్త చరిత్ర’ సినిమా తీసిన ఆర్జీవీ ఇప్పుడు ‘తెలంగాణలో జరిగిన రక్తచరిత్ర’పై సినిమా తీస్తున్నట్లు చెప్పారు. దీనికి సంబంధించిన ఓ వాట్సాప్ ఆడియో గతంలో వైరల్ అయింది. ఈ ప్రకటన సమయంలో కారల్ మార్క్స్ను గుర్తుచేసుకున్న వర్మ.. ‘విప్లవం ఎప్పటికీ ఆగదు.. కేవలం రూపు మార్చుకుంటుంది’ అని చెప్పారు. కొండా సినిమా షూటింగ్ వరంగల్ పరిసరాల్లో ఉంటుందని తెలిపారు.
