బెనిఫిట్ షోల(Premiere Shows)పై తెలంగాణ ప్రభుత్వం కీలక నిర్ణయం తీసుకుంది. పుష్ప 2 ప్రీమియర్ షో సందర్భంగా హైదరాబాద్ ఆర్టీసీ క్రాస్ రోడ్స్‌లోని సంధ్యథియేటర్‌లో జరిగిన తొక్కిసలాటలో రెండు ప్రాణాలు పోవడంతో ఈ అంశంపై ప్రభుత్వం దృష్టిసారించింది. ఇకపై రాష్ట్రంలో ఏ సినిమాకు కూడా బెనిఫిట్ షోలు, ప్రీమియర్ షోలకు అనుమతులు ఇచ్చేది లేదని తేల్చి చెప్పేసింది. ఈ మేరకు నిర్ణయాన్ని రాష్ట్ర మంత్రి కోమటి రెడ్డి వెంకట్ రెడ్డి వెల్లడించారు.
‘‘ఇక నుంచి తెంగాణలో బెనిఫిట్ షోల(Premiere Shows)కు ఎట్టి పరిస్థితుల్లో అనుమతులివ్వం. ఎంతటి భారీ బడ్జెట్ సినిమా అయితే ఆదయం ఆట నుంచే షోస్ వేయాలి’’ అని వెల్లడించారు. ప్రభుత్వం తీసుకున్న ఈ నిర్ణయం రానున్న స్టార్ హీరోల సినిమాలకు భారీ ఎదురుదెబ్బ కానుంది. సినిమాల ఆదాయాల కన్నా ప్రజల శ్రేయస్సు ముఖ్యమనే తమ ప్రభుత్వం ఈ నిర్ణయం తీసుకుందని ప్రభుత్వ వర్గాలు తెలుపుతున్నాయి.
ఇదిలా ఉంటే సంధ్యా థియేటర్ ఘటనకు సంబంధించి అల్లు అర్జున్(Allu Arjun), ఆయన టీమ్, థియేటర్ యాజమాన్యంపై కేసు నమోదైంది. బాధిత కుటుంబం ఫిర్యాదు మేరకు ఈ కేసు నమోదు చేసినట్లు డీసీపీ అక్షాంశ్ యాదవ్ వెల్లడించారు. అల్లు అర్జున్ రానున్నట్లు పోలీసులకు తెలియదని, థియేటర్ యాజమాన్యం కూడా ఈ సమాచారాన్ని తమకు ఇవ్వలేదని పోలీసులు తెలిపారు.
అంతేకాకుండా భారీగా ప్రేక్షకులు అక్కడకు చేరిన క్రమంలో థియేటర్ ఎంట్రన్స్, ఎగ్జిట్‌లలో సరైన భద్రత కూడా ఏర్పాటు చేయలేదని, ప్రైవేటె సెక్యూరిటీని కూడా నియమించుకోలేదని అక్షాంశ్ తెలిపారు. ఈ ఘటనకు బాధ్యులపై కఠిన చర్యలు తీసుకుంటామని ఆయన భరోసా ఇచ్చారు. అయితే బాధిత కుటుంబాన్ని ఆదుకుంటామని మైత్రి మూవీ మేకర్స్(Mythri Movie Makers) ఇప్పటికే ప్రకటించింది.
