ఐదు రాష్ట్రాల ఎన్నికల ఓట్ల లెక్కింపు ప్రక్రియ కొనసాగుతోంది. ఐదు రాష్ట్రాలకు గత నెల 10 నుంచి ఈ నెల 7 వరకు వివిధ విడతల్లో పోలింగ్ జరిగింది. అత్యధికంగా ఉత్తర్‌ప్రదేశ్‌లో ఏడు దశల్లో ఓటింగ్‌ను నిర్వహించారు. మణిపుర్లో రెండు దశల్లో పోలింగ్ జరగగా.. పంజాబ్, ఉత్తరాఖండ్, గోవాలో ఒకే దశలో పోలింగ్ పూర్తయింది.
ఎన్నికల ఫలితాల్లో కాంగ్రెస్ ఐదు రాష్ట్రాల్లోనూ ప్రభావం చూపించలేకపోయింది. ప్రస్తుతం అధికారంలో ఉన్న పంజాబ్లోనూ చేతులెత్తేసింది కాంగ్రెస్. అక్కడ ఆమ్ఆద్మీ పార్టీ 80 స్థానాలకుపైగా ఆధిక్యంతో దూసుకెళ్తోంది. కాంగ్రెస్ 12 చోట్ల మాత్రమే లీడింగ్లో ఉంది. అలాగే ఉత్తర్ప్రదేశ్ మరీ ఘోరంగా 4 స్థానాల్లో లీడ్తో.. సింగిల్ డిజిట్లోనే ఉంది.
ఉత్తరాఖండ్లో 23 చోట్ల ఆధిక్యంలో ఉండగా.. మేజిక్ ఫిగర్ను అందుకోవాలంటే 36 చోట్ల నెగ్గాల్సి ఉంటుంది. గోవాలో హంగ్ దిశగా ఫలితాలు కనిపిస్తున్నాయి. భాజపాతో కాంగ్రెస్ హోరాహోరీగా పోటీపడుతుంది. కనీస మెజార్టీకి 21 స్థానాలు అవసరం కాగా.. భాజపా 18, కాంగ్రెస్ కూటమి 14 చోట్లకు పైగా ఆధిక్యంలో ఉన్నాయి. మణిపుర్లోనూ భాజపా ఆధిక్యంలో మేజిక్ ఫిగర్కు దగ్గర్లో ఉంది. కాంగ్రెస్ కూటమి 13 చోట్లకుపైగా ఆధిక్యంలో ఉంది.
