మాజీ మంత్రి, బీఆర్ఎస్ కీలక నేత మల్లారెడ్డి(Malla Reddy)కి ఈడీ నోటీసులు జారీ చేసింది. మల్లారెడ్డికి సంబంధించి మెడికల్ కాలేజీల్లో పీజీ సీట్ల కేటాయింపులో అవకతవకలు జరిగాయంటూ ఈడీ అధికారులు నోటీసులు జారీ చేశారు. ఈ అవకతవకలపై వివరణ ఇవ్వాలని వారు నోటీసుల్లో కోరినట్లు సమాచారం. అయితే గతేడాది జూన్‌లో మల్లారెడ్డికి చెందిన 12 మెడికల్ కాలేజీల్లో ఈడీ అధికారులు సోదాలు నిర్వహించారు. ఈ తనిఖీల అనంతరం భారీ సంఖ్యలో డాక్యుమెంట్లు, పెన్‌డ్రైవ్‌లు, హార్డ్ డ్రైవ్‌లను అధికారులు స్వాధీనం చేసుకున్నారు. వాటిని అనలైజ్ చేయడం ముగియడంతోనే తాజాగా మల్లారెడ్డి నోటీసులు జారీ చేసినట్లు తెలుస్తుంది.
అంతేకాకుండా గతేడాది 10 ప్రవేటు మెడికల్ కాలేజీలు 45కు పైగా పీజీ సీట్లను బ్లాక్ చేశాయి. ఆ తర్వాత వాటిని అధిక మొత్తానికి విక్రయించారని ఈడీ అధికారులు గుర్తించినట్లు తెలుస్తోంది. వాటిపై వివరణ కోరడం కోసమే మల్లారెడ్డి(Malla Reddy)కి నోటీసులు జారీ చేసినట్లు ఈడీ వర్గాలు తెలుపుతున్నాయి.
