Madhapur | హైదరాబాద్ పోలీసులు మరో రేవ్ పార్టీ భగ్నం చేశారు. మాధాపూర్ లోని ఓ అపార్ట్‌మెంట్‌ లో రేవ్‌పార్టీని నార్కోటిక్స్ బ్యూరో అధికారులు భగ్నం చేశారు. రేవ్ పార్టీని నిర్వహిస్తున్నారని సమాచారం అందుకున్న అధికారులు దాడులు నిర్వహించారు. ఈ దాడుల్లో రేవ్ పార్టీలో పాల్గొన్న వారి నుంచి భారీగా డ్రగ్స్ ను స్వాధీనం చేసుకున్నారు. ఈ పార్టీలో పాల్గొన్న పలువురిని అధికారులు అరెస్టు చేశారు.
వీరిలో సినీ నిర్మాత వెంకట్‌ తో పాటు పలువురు సినీ ఇండస్ట్రీకి చెందిన ప్రముఖులు, పలువురు యువతులు ఉన్నట్లు సమాచారం. అరెస్టయిన వారిని మాధాపూర్(Madhapur) పోలీసులకు నార్కోటిక్స్ బ్యూరో అధికారులు అప్పగించారు. రేవ్ పార్టీకి సంబంధించి మరిన్ని వివరాలను సేకరించే పనిలో నార్కోటిక్స్ బ్యూరో అధికారులు నిమగ్నమయ్యారు. వీరికి డ్రగ్స్ ఎలా వచ్చింది? ఎవరు సరఫరా చేశారు? అనే కోణంలో కూపీలాగుతున్నారు.
