దేశ వ్యాప్తంగా కొవిడ్ పరిస్థితులపై అన్ని రాష్ట్రాలు, కేంద్ర పాలిత ప్రాంతాల ఆరోగ్య శాఖ అధికారులతో కేంద్రం సమీక్ష నిర్వహించింది. కొవిడ్ సంసిద్ధతపై కేంద్ర ఆరోగ్య శాఖ కార్యదర్శి రాజేశ్ భూషణ్ చర్చించారు.
కొవిడ్-19 క్లినికల్ చికిత్సలో ఉపయోగించి 8 డ్రగ్స్ బఫర్ స్టాక్ ఉండేలా చూసుకోవాలని ఆయన స్పష్టం చేశారు. కేసులు పెరిగితే పరిస్థితులను ఎదుర్కొనేందుకు ఆస్పత్రులు సిద్ధంగా ఉన్నాయా? అన్న అంశంపైనా సమీక్షించారు.
కరోనా కొత్త వేరియంట్ ఒమిక్రాన్ కేసులు స్వల్పంగా పెరుగుతున్నాయి. ఈ నేపథ్యంలోనే.. ఆస్పత్రుల్లో వెంటిలేటర్లు, పీఎస్ఏ ప్లాంట్లు, ఆక్సిజన్ కాన్సంట్రేటర్లు సిద్ధంగా ఉంచుకోవాలని ఆయా రాష్ట్రాలకు స్పష్టం చేశారు. టెస్ట్, ట్రాక్, ట్రీట్, వ్యాక్సినేట్, కొవిడ్ నిబంధనలకు లోబడి ఉండటం.. అనే ఐదు సూత్రాలను ప్రధానంగా ప్రస్తావించారు రాజేశ్ భూషణ్. ఇవే కరోనా నివారణకు మార్గాలని అన్నారు.
హాట్స్పాట్లు, బ్రేక్త్రూ ఇన్ఫెక్షన్ కేసుల అంశంపైనా సమీక్షలో చర్చించారు. పాజిటివ్గా నిర్ధరణ అయిన బాధితుల సన్నిహితుల వివరాలను సేకరించి.. ప్రొటోకాల్ ప్రకారం టెస్టులు జరపాలని ఆయన స్పష్టం చేశారు.
