PSLV-C54 Rocket will ber lanched from Shar: పీఎస్‌ఎల్‌వీ -సీ54 రాకెట్‌ ప్రయోగానికి ఇస్రో సర్వం సిద్ధం చేసింది. షార్‌ నుంచి నేటి ఉదయం 11.56 గంటలకు రాకెట్‌ నింగిలోకి దూసుకుపోనుంది. మన దేశానికి చెందిన 1,117 కిలోల ఓషన్‌ శాట్‌-3తో పాటు, మరో 8 ఉపగ్రహాలను నింగిలోకి పంపించనున్నారు. షార్‌లోని మెుదటి ప్రయోగ వేదిక నుంచి పీఎస్‌ఎల్‌వీ-సీ 54 రాకెట్‌ ఎగరనుంది. ఈ ప్రయోగం ద్వారా ఓషన్‌ శాట్‌-3తో పాటు మరో 8 ఉపగ్రహాలను ఇస్రో కక్ష్యలోకి ప్రవేశపెట్టనుంది. హైదరాబాద్‌కు చెందిన స్టార్టప్‌ ధ్రువస్పేస్‌ రూపొందించిన థైబోల్ట్‌ 1, థైబోల్ట్‌ 2 ఉపగ్రహాలు మిగిలిన శాటిలైట్స్‌తో ప్రయోగించనున్నారు. ఈ రెండు ఉపగ్రహాలను పూర్తిగా, హైదరాబాద్‌లోనే నిర్మించినట్లు ధ్రువ స్పేస్‌ సీఈవో, సహా వ్యవస్థాపకుడు సంజయ్‌ నెక్కంటి వివరించారు. ఈ ఉపగ్రహాల ద్వారా ప్రపంచ వ్యాప్తంగా రేడియో ఆపరేటర్లకు ప్రయోజనం చేకూర్చనున్నట్లు తెలిపారు. పీఎస్‌ఎల్‌వీ-సీ54 (PSLV-C54) ప్రయోగం విజయవంతం కావాలని ఇస్రో ఛైర్మన్‌ ఎస్‌ సోమనాథ్‌ శుక్రవారం నాడే షార్‌ సమీపంలో ఉన్న చెంగాళమ్మ ఆలయంతో పాటు, తిరుమల శ్రీవారి ఆలయంలో రాకెట్‌ నమూనాలకు ప్రత్యేక పూజలు చేశారు.
