ప్రముఖ సినీ నటుడు రఘుబాబు(Raghu Babu) నడుపుతున్న కారు ఢీకొని బైక్‌ మీదున్న వ్యక్తి అక్కడికక్కడే మృతిచెందాడు. నల్లగొండ జిల్లా కేంద్రం శివారు అద్దంకి-నార్కట్‌పల్లి రహదారిపై ఈ ప్రమాదం సంభవించింది. మృతుడిని బీఆర్ఎస్ నాయకుడు సందినేని జనార్దన్‌ రావుగా గుర్తించారు. బుధవారం సాయంత్రం బైక్‌పై వెంచర్‌కు వెళుతూ నల్లగొండ శివారులోని లెప్రసీ కాలనీ వద్ద రోడ్డు దాటుతున్నాడు. ఇదే సమయంలో హైదరాబాద్‌ నుంచి గుంటూరుకు కారును స్వయంగా నడుపుతూ వెళ్తున్న రఘుబాబు.. వెనక నుంచి ద్విచక్రవాహనాన్ని బలంగా ఢీకొట్టారు. దీంతో జనార్దన్‌రావు ఎగిరి డివైడర్‌ మీద పడ్డారు. తల, ఛాతి భాగంలో బలమైన గాయాలు కావడంతో స్పాట్‌లోనే ప్రాణాలు కోల్పోయాడు.
ఆయనకు కుమార్తె, కుమారుడు ఉన్నారు. జనార్దన్‌రావు భార్య నాగమణి ఫిర్యాదుతో రఘుబాబు(Raghu Babu)ను అదుపులోకి తీసుకుని కేసు నమోదు చేసినట్లు ఎస్సై వివరించారు. అనంతరం వ్యక్తిగత పూచీకత్తుపై షరతులతో కూడిన బెయిల్‌ మంజూరు చేసినట్లు తెలిపారు. జనార్థన్ రావు మృతిపట్ల నల్లగొండ మాజీ ఎమ్మెల్యే కంచర్ల భూపాల్ రెడ్డి తీవ్ర దిగ్భ్రాంతి వ్యక్తంచేశారు. ప్రభుత్వాస్పత్రిలో ఆయన మృతదేహాన్ని పరిశీలించి నివాళుర్పించారు. ఈ సందర్భంగా మాట్లాడుతూ సీనియర్ నాయకుడిని పార్టీ కోల్పోవడం చాలా బాధాకరమని వెల్లడించారు.
Read Also: రాబోయే రోజులు మనవే.. పార్టీ నేతలతో కేసీఆర్..
Follow us on: Google News, Koo, Twitter, ShareChat
