ప్రభుత్వ బ్యాంకింగ్ దిగ్గజం స్టేట్‌ బ్యాంక్‌ ఆఫ్‌ ఇండియా శుభవార్త చెప్పింది. ఫిక్స్డ్ డిపాజిట్ల(ఎఫ్‌డీ)పై చెల్లించే వడ్డీ రేట్లను పెంచుతున్నట్లు బ్యాంకు ప్రకటించింది. ఈనెల 10 నుంచి ఇది అమల్లోకి వస్తుందని పేర్కొంది. రూ.2 కోట్లకు పైబడిన ఫిక్స్డ్ డిపాజిట్లపై మాత్రమే ఇది వర్తిస్తుందని ఎస్బిఐ తెలిపింది.
రూ.2 కోట్లకు పైబడిన ఫిక్స్డ్ డిపాజిట్లపై వడ్డీ రేట్లను 20-40 బేసిస్‌ పాయింట్ల మేరకు పెంచినట్లు వెల్లడించింది. వడ్డీ రేట్లను పెంచడం వల్ల మార్చి 10 నుంచి ఎఫ్‌డీలపై 3.30 శాతం వడ్డీ లభించనుంది. అలాగే సీనియర్ సిటిజన్లకు ఈ ఎఫ్‌డీలపై వడ్డీ రేటు 3.60 శాతం నుంచి 3.80 శాతానికి పెరిగింది.
ఏడాది నుంచి 10 ఏళ్ల వ్యవధి డిపాజిట్లపై 3.60శాతం, వయోధికులకు 4.10శాతం వడ్డీ లభిస్తుంది. ఇక రూ.2 కోట్లలోపున్న డిపాజిట్లపై రెండు- మూడేళ్ల కాలవ్యవధికి 5.20శాతం, మూడు నుంచి ఐదేళ్లలోపు డిపాజిట్లపై 5.45 శాతం వడ్డీని అందిస్తోంది. 5-10 ఏళ్ల వ్యవధి డిపాజిట్లపై 5.50 శాతం వడ్డీనిస్తోంది.
