వాట్సాప్ ప్రముఖ సామాజిక మాధ్యమాల్లో ఒకటి. యూజర్ల కోసం ఎప్పటికప్పుడు అప్డేట్ ఫీచర్లను తీసుకొస్తుంది. తాజాగా ఈ యాప్ మరో సరికొత్త ఫీచర్ను అందుబాటులోకి తీసుకువస్తోందని నెట్టింట వార్తలు చక్కర్లు కొడుతున్నాయి. అదే మూడు టిక్కుల ఫీచర్. మరి ఇందులో వాస్తవం ఎంతో ఇప్పుడు తెలుసుకుందాం..
సాధారణంగా వాట్సాప్లో మనం ఎవరికైనా మెసేజ్ చేస్తే..డెలివరీ కాకపోతే ఒక బూడిద రంగు టిక్ కనిపిస్తుంది. అదే డెలివరీ అయితే రెండు టిక్ సింబల్స్ అదే రంగులో కనిపిస్తాయి. ఒక వేళ మనం పంపిన మెసేజ్ను ఎదుటి వ్యక్తి చూస్తే..ఆ రెండు టిక్ సింబల్స్ కాస్తా నీలి రంగులోకి మారిపోతాయి. ఇది సాధారణంగా జరిగే ప్రక్రియే. వీటికి తోడు మన చాట్ను, మీడియాను స్క్రీన్ షాట్ తీస్తే.. మనకు తెలిసేందుకు వాట్సాప్ మూడో టిక్ సింబల్ను తీసుకురానున్నట్లు గాసిప్స్ వినిపించాయి.
అవతలి వ్యక్తి మన మెసేజ్లు, మనం పంపిన ప్రైవేట్ వీడియోలు, ఫొటోలను స్క్రీన్ షాట్ తీస్తే.. వెంటనే అలర్ట్గా మూడు టిక్కులు కనిపిస్తాయన్నది ఆ వార్తల సారాంశం. అంతేగాకుండా ఈ ఫీచర్ను పరీక్షించి త్వరలోనే వాట్సాప్ యూజర్లకు అందుబాటులోకి తీసుకువచ్చేందుకు ప్రణాళికలు రచిస్తున్నట్లు న్యూస్ తెగ వైరల్ అయ్యింది. అయితే ఇది పూర్తిగా అవాస్తవం అని వాట్సాప్ వివరాలను ఎప్పటికప్పుడు లీక్ చేసే వెబ్ బీటా ఇన్ఫో తెలిపింది.
వాస్తవానికి ఇలాంటి ఫీచర్ ఇతర యాప్ల్లో అందుబాటులో ఉంది. యువత ఎక్కువగా ఉపయోగించే స్నాప్చాట్, ఇన్స్టాగ్రామ్ డీఎం వానిష్ మోడ్లలో ఎదుటి వ్యక్తి స్క్రీన్ షాట్ తీస్తే మనకు తెలిసే ఫీచర్ ఉంది. నిజానికి ఈ ఫీచర్ను వివిధ కారణాల వల్ల వాట్సాప్ తీసుకురాలేదు. కాబట్టి ఈ వార్తలు అవాస్తవం.
