తెలంగాణ వ్యాప్తంగా విస్తారంగా వర్షాలు కురుస్తున్నాయి. దీంతో అనేక చోట్ల వర్షపు నీరు రోడ్లపైనే నిలిచిపోవడంతో చాలామంది ఆ నీటిలో నుంచే నడిచి వెళ్తున్నారు. కానీ వాన నీటిలో నడవడం ప్రమాదకరమని ఆరోగ్య నిపుణులు హెచ్చరిస్తున్నారు. ఎందుకంటే రకరకాల ప్రదేశాల నుంచి వచ్చి చేరే ఆ కలుషిత నీటిలో నడవడం ద్వారా హానికారక వైరస్ శరీరంలోకి ప్రవేశించే ప్రమాదం ఉంది.
ముఖ్యంగా లెప్టోస్పైరోసిస్ అనే వ్యాధి బారిన పడే అవకాశం అధికంగా ఉంటుందని హెచ్చరిస్తున్నారు. ఈ వ్యాధి సోకినవారు 24 నుంచి 72 గంటల వ్యవధిలో వైద్యుడిని సంప్రదించడం మేలని వెల్లడించారు. లెప్టోస్పైరా అనే సూక్ష్మజీవిని అనేక జంతువులు తీసుకొస్తాయి. ఈ వ్యాధికి ప్రత్యేక వ్యాధి లక్షణాలు ఏమీ ఉండవు.
కానీ వర్షాకాలంలో జ్వరం వస్తే వెంటనే వైద్యుడిని సంప్రదించి వైద్యుల సలహా మేరకే తగిన మందులు వాడాలి. వర్షాకాలంలో లెప్టోస్పైరోసిస్తో పాటు మరెన్నో వ్యాధులు సోకే ప్రమాదముంది. అవేంటంటే..మలేరియా, డయేరియా,కలరా, పారాసైటిక్ క్రిప్టోస్పోరీడియం, డెంగ్యూ, చికున్ గున్యా, శ్వాస సంబంధ ఇన్ఫెక్షన్లు, చర్మ సంబంధ సమస్యలు వచ్చే అవకాశం కూడా ఉంటుంది.
