టాలీవుడ్ టాలెంటెడ్ డైరెక్టర్లలో కృష్ణవంశీ ఒకరు. ప్రయోగాత్మక, కుటుంబకథా చిత్రాలకు ప్రాధాన్యత ఇచ్చే ఆయన కొంతకాలంగా హిట్ లేక ఇబ్బందిపడుతున్నారు. ప్రస్తుతం ‘రంగమార్తాండ’ సినిమా పనుల్లో బిజీగా ఉన్న ఆయన.. త్వరలోనే భారీ బడ్జెట్ సినిమాను రూపొందించేందుకు సన్నాహాలు చేస్తున్నారు. ప్రస్తుతం ఈ వార్త సోషల్ మీడియాలో హల్ చల్ చేస్తుంది.
“ఓటీటీ కోసం ప్రాజెక్ట్ చేయాలనుకుంటున్నా. అన్నీ కుదిరితే వచ్చే ఏడాదిలో ప్రారంభిస్తా. ఇప్పుడే దాని గురించి చెప్పను కానీ తప్పకుండా అది పెద్ద ప్లాన్‌ అవుతుంది. రూ.200 కోట్ల నుంచి రూ.300 కోట్ల వరకూ బడ్జెట్‌తో ఈ ప్రాజెక్ట్ సిద్ధమయ్యే అవకాశం ఉంది. మనం ఏది అనుకుంటే అది తీసే స్వేచ్ఛ ఓటీటీలో ఉంటుంది. నియమ నిబంధనలు పాటించాల్సిన అవసరం కూడా ఉండదు” అని కృష్ణవంశీ వివరించారు.
కృష్ణవంశీ ప్రస్తుతం ‘రంగమార్తాండ’ చేస్తున్నారు. మరాఠీలో సూపర్‌హిట్‌ అందుకున్న ‘నట్‌సామ్రాట్‌’కు ఇది రీమేక్‌. ప్రకాశ్‌రాజ్‌, రమ్యకృష్ణ, బ్రహ్మానందం, రాహుల్‌ కీలకపాత్రలు పోషిస్తున్నారు. థియేటర్‌ ఆర్టిస్టులు ఎదుర్కొంటున్న ఇబ్బందులు ఏంటి? ప్రస్తుతం ఉన్న రోజుల్లో తల్లిదండ్రుల్ని పిల్లలు ఎలా చూస్తున్నారు? వంటి భావోద్వేగభరితమైన అంశాలతో ఈ చిత్రాన్ని రూపొందిస్తున్నారు.
