ఉమ్మడి ఆంధ్రప్రదేశ్ మాజీ ముఖ్యమంత్రి కొణిజేటి రోశయ్య అంత్యక్రియలు అశ్రునయనాల నడుమ ముగిశాయి. కొంపల్లిలోని ఆయన వ్యవసాయ క్షేత్రం దేవరయాంజాల్ ఫామ్హోస్లో రాష్ట్ర ప్రభుత్వం.. అధికారిక లాంఛనాలతో అంతిమ సంస్కారాలు నిర్వహించింది. సాయంత్రం 3గంటల 50నిమిషాలకు అంత్యక్రియల ప్రక్రియను పూర్తి చేశారు.
అంత్యక్రియలకు మాజీ మంత్రులు గీతారెడ్డి, శ్రీధర్‌బాబు, మాజీ ఎంపీ వి.హనుమంతరావు, ఎమ్మెల్యేలు వివేకానంద, గణేశ్ గుప్తా, కోలేటి దామోదర్ గుప్తా, బీసీ కమిషన్ ఛైర్మన్ వకులాభరణం కృష్ణ మోహన్ రావు.. ఏపీ ప్రభుత్వం తరఫున మంత్రులు వెల్లంపల్లి శ్రీనివాస్, బోత్స సత్యనారాయణ, బాలినేని శ్రీనివాస్ రెడ్డి, పేర్నినాని, మాజీ ఎంపీ కేవీపీ రామచంద్రరావు తదితరులు హాజరయ్యారు.