తెలంగాణలో కరోనా విజృంభిస్తుంది. రాష్ట్రంలో రోజురోజుకు పాజిటివ్ కేసులు పెరుగుతుండడం ఆందోళన కలిగిస్తుంది. ఒక వైపు కరోనా, మరో వైపు కొత్త వేరియంట్‌ ఒమిక్రాన్‌ వ్యాప్తి చాపకింది నీరులా వ్యాపిస్తుంది. ఈ నేపథ్యంలో రేపు (సోమవారం) మధ్యాహ్నం రెండు గంటలకు ముఖ్యమంత్రి కె.చంద్రశేఖరరావు అధ్యక్షతన ప్రగతి భవన్ లో కేబినెట్ సమావేశం జరగనుంది. ఈ సమావేశంలో నైట్ కర్ఫ్యూ, ఆంక్షలపై నిర్ణయం తీసుకునే ఛాన్స్ ఉంది.
విద్యాసంస్థలకు సెలవులను మరోసారి పెంచింది సర్కార్. తెలంగాణాలో 30వ తేదీ వరకు అన్ని విద్యాసంస్థలను మూసివేస్తూ విద్యాశాఖ నుంచి అధికారికంగా ప్రకటన వెలువడింది. ఈ మేరకు రాష్ట్ర ప్రభుత్వ ప్రధాన కార్యదర్శి (సీఎస్‌) సోమేశ్‌కుమార్‌ ఉత్తర్వులు జారీ చేశారు. కరోనా తదితర విషయాల మీద కేబినేట్ లో చర్చించనున్నారు.
తెలంగాణలో కరోనా కేసులు భారీగా నమోదవుతున్నాయి. నిన్న 53,073 మందికి కరోనా పరీక్షలు నిర్వహించగా.. 1963 పాజిటివ్ కేసులు నమోదయ్యాయి. దీంతో మొత్తం ఇప్పటివరకు నమోదైన కేసుల సంఖ్య 7,07,162కు చేరింది. ఈ మేరకు వైద్య ఆరోగ్యశాఖ హెల్త్ బులిటెన్‌ విడుదల చేసింది.