చైనాలో కరోనా వ్యాప్తి మళ్లీ కలవరం సృష్టిస్తోంది. పర్యటకుల కారణంగా ఆ దేశంలో వైరస్ బాధితులుగా మారే వారి సంఖ్య పెరుగుతోంది. ఈ నేపథ్యంలో ఆంక్షలను కఠినతరం చేస్తున్నారు అక్కడి అధికారులు. వైరస్ ప్రభావిత ప్రాంతాల్లోని వందలాది విమానాల రాకపోకలపై నిషేధం విధించారు. పాఠశాలలను మూసివేశారు. పెద్దఎత్తున పరీక్షలు చేపడతున్నారు.
చైనాలో కొవిడ్ కేసులు మళ్లీ పెరగడానికి పర్యటకులైన ఓ వృద్ధ దంపతులే కారణమని అక్కడి అధికారులు అనుమానిస్తున్నారు. షాంఘై నుంచి బయలుదేరిన ఆ దంపతులు..గన్సు ప్రావిన్సు, ఇన్నర్ మంగోలియా, జియాన్ నగరాల్లో పర్యటించారని భావిస్తున్నారు. వారితో సన్నిహితంగా ఉన్న కారణంగా చైనా రాజధాని బీజింగ్ సహా ఐదు ప్రావిన్సులు, ఇతర ప్రాంతాల్లో వైరస్ కేసులు వెలుగు చూశాయి. దీంతో స్థానిక ప్రభుత్వాలు. వైరస్ కట్టడికి నడుం బిగించాయి.
లాంజోవ్ నగరంలో ప్రజలను అనవసరంగా బయటకు వెళ్లకూడదని అధికారులు ఆదేశాలు జారీ చేశారు. ఎవరైనా బయటకు వెళ్లేవారు కచ్చితంగా కరోనా నెగెటివ్గా తేలిన ధ్రువపత్రాలను సమర్పించాలని చెప్పారు. వైరస్ ప్రభావిత ప్రాంతాల్లోని విమానాశ్రయాలను అధికారులు మూసివేశారు.