తమిళ స్టార్ హీరో ధనుష్ నేరుగా చేస్తున్న తొలి తెలుగు సినిమా లాంఛనంగా ప్రారంభమైంది. హైదరాబాద్లో సోమవారం పూజా కార్యక్రమం జరిగింది. ఈ కార్యక్రమానికి స్టార్ డైరెక్టర్ త్రివిక్రమ్.. ముఖ్య అతిథిగా హాజరై, క్లాప్ కొట్టారు. జనవరి 5 నుంచి రెగ్యులర్ షూటింగ్ ప్రారంభించనున్నట్లు తెలుస్తుంది.
‘సార్’ టైటిల్తో తీస్తున్న ఈ చిత్రానికి వెంకీ అట్లూరి దర్శకత్వం వహిస్తున్నారు. ‘భీమ్లా నాయక్’లో రానాకు జోడీగా నటిస్తున్న సంయుక్త మేనన్.. ఈ సినిమా కోసం హీరోయిన్గా ఎంపిక చేశారు. జీవీ ప్రకాశ్ సంగీతమందిస్తున్నారు. సితార ఎంటర్టైన్మెంట్స్, ఫార్చున్ 4 సినిమాస్ సంయుక్తంగా నిర్మిస్తున్నాయి. ఇటీవల ‘అత్రంగి రే’ సినిమాతో ధనుష్ ప్రేక్షకుల ముందుకొచ్చారు. అక్షయ్ కుమార్, సారా అలీఖాన్ కూడా నటించిన ఈ హిందీ సినిమా నేరుగా డిస్నీ ప్లస్ హాట్స్టార్లో స్ట్రీమింగ్ అవుతుంది.
‘వైదిస్ కొలవెరీ దీ’ అంటూ దేశాన్ని ఊపేసిన ధనుష్.. తమిళంలో ఎన్నో హిట్లు అందుకున్నాడు. బాలీవుడ్లోనూ రాంఝానా సినిమాతో అదరగొట్టాడు. రఘువరన్ బిటెక్, వీఐపీ సినిమాలతో తెలుగులోనూ మంచి క్రేజ్ సంపాదించుకున్నాడు.
