అక్టోబర్ నెలకు సంబంధించి ‘ప్లేయర్ ఆఫ్ ది మంత్’ జాబితాను ప్రకటించింది అంతర్జాతీయ క్రికెట్ మండలి. ప్రపంచవ్యాప్తంగా మెరుగైన ప్రదర్శన చేసే ఆటగాళ్లను గుర్తించి ప్రతి నెల వారికి అవార్డులను ఇచ్చే కార్యక్రమాన్ని ఈ ఏడాది జనవరి నుంచి ప్రారంభించింది ఐసీసీ. అందులో భాగంగానే అక్టోబర్ నెల కోసం టాప్ ఆటగాళ్ల పేర్లను వెల్లడించింది.
టీ20 ప్రపంచకప్లో భాగంగా అత్యుత్తమ బ్యాటింగ్ నైపుణ్యం కనబరిచిన పాకిస్థాన్ ఆటగాడు అసిఫ్ అలీకి ఈ ఐసీసీ విడుదల చేసిన జాబితాలో చోటు దక్కింది. ఇతడితో పాటు బంగ్లాదేశ్ ఆల్రౌండర్ షకిబ్ అల్ హసన్, నమీబియా ఆటగాడు డేవిడ్ వైస్కు స్థానం లభించింది.
అలాగే మహిళా క్రికెటర్లలో ఐర్లాండ్ ఆల్రౌండర్ లారా దిలానీ, బ్యాటర్ గాబీ లెవిస్, జింబాబ్వే కెప్టెన్, ఆల్రౌండర్ మేరీ అన్నె ముసోండా.. ‘ప్లేయర్ ఆఫ్ ది మంత్’కు నామినేట్ అయ్యారు.
