అనారోగ్యం పాలైన బాలికకు మెరుగైన వైద్యం చేయిస్తానని తీసుకెళ్లిన ఓ మాయలేడీ రొంపిలోకి దింపింది. ఈ దారుణ ఘటన గుంటూరు జిల్లాలో చోటుచేసుకుంది. ఎట్టకేలకు తండ్రి ఫిర్యాదుతో పోలీసులు కేసు నమోదు చేసుకుని దర్యాప్తు చేపట్టారు.
పల్నాడులో 13ఏళ్ల బాలిక ఓ పాఠశాలలో ఐదో తరగతి చదువుతోంది. కరోనా బారిన పడ్డ బాలిక, ఆమె తల్లి గుంటూరు జనరల్ ఆసుపత్రిలో చేరగా స్వర్ణభారతినగర్‌కు చెందిన ఓ మహిళ నమ్మించి తన వెంట ఇంటికి తీసుకెళ్లింది. కొద్ది రోజులకే వ్యభిచారం చేయాలని బాలికపై తీవ్రస్థాయిలో ఒత్తిడి తెచ్చింది.
ఆ పని చేయడం ఇష్టం లేదని చెప్పిన బాలికను ఇంట్లో బంధించి బయటకు రానీయకుండా శారీరకంగా, మానసికంగా వేధింపులకు గురిచేసింది. కొన్నాళ్లు గుంటూరులో ఆ తర్వాత ఒంగోలు, నెల్లూరు, విజయవాడకు సైతం తీసుకెళ్లి వ్యభిచారం చేయించినట్లు పోలీసుల ప్రాథమిక విచారణలో వెల్లడైంది.