లోకేష్ పాదయాత్ర పున:ప్రారంభానికి ముహుర్తం ఖరారు..!

టీడీపీ జాతీయ ప్రధాన కార్యదర్శి నారా లోకేశ్‌(Nara Lokesh) యువగళం పాదయాత్ర(Yuvagalam Padayatra) త్వరలోనే పున: ప్రారంభం కానుంది. నవంబర్ 24 నుంచి పాదయాత్ర తిరిగి ప్రారంభం కానున్నట్లు తెలుస్తోంది. ఆగిన చోట నుంచే పాదయాత్ర ప్రారంభిస్తారని టీడీపీ నేతలు చెబుతున్నారు. అయితే శ్రీకాకుళం జిల్లాలోని ఇచ్ఛాపురంలో కాకుండా విశాఖలోనే పాదయాత్రను ముగించనున్నారు. గతంలో పార్టీ అధినేత చంద్రబాబు ‘వస్తున్నా మీకోసం పాదయాత్ర’ను విశాఖలోనే ముగించారు. ఇప్పుడు అదే సెంటిమెంట్‌తో లోకేశ్‌ కూడా విశాఖలోనే ముగించాలని అనుకుంటున్నారు.

ఈ ఏడాది జనవరిలో యువగళం(Yuvagalam) పాదయాత్రను ఉమ్మడి చిత్తూరు జిల్లాలోని కుప్పం నియోజకవర్గం నుంచి ప్రారంభించారు. రాయలసీమ మీదుగా కోస్తా ప్రాంతంలోని డాక్టర్ బీఆర్ అంబేద్కర్ కోనసీమ జిల్లా రాజోలు వరకు పాదయాత్ర 208రోజుల పాటు కొనసాగింది. అయితే స్కిల్ డెవలెప్‌మెంట్ కేసు(Skill Development Case)లో అనూహ్యంగా చంద్రబాబును సీఐడీ అధికారులు అరెస్ట్ చేయడంతో పాదయాత్రకు విరామం ప్రకటించిన సంగతి తెలిసిందే. పాదయాత్రలో ఇప్పటివరకు మొత్తం 2852.4 కిలోమీటర్ల దూరం నడిచారు. విశాఖలో భారీ బహిరంగ సభ ఏర్పాటు చేసి అక్కడితో పాదయాత్ర ముగించాలని భావిస్తున్నట్లు సమాచారం.

Read Also: చంద్రబాబుకు బిగ్ రిలీఫ్.. స్కిల్ కేసులో బెయిల్ మంజూరు