ఒలింపిక్ పతక వీరుడు, జావెలిన్ త్రో ఆటగాడు నీరజ్ చోప్డాపై బయోపిక్ రానుందని కొన్నాళ్లుగా ఊహాగానాలు వస్తున్నాయి. ఈ నేపథ్యంలో వీటిని కొట్టిపారేశాడు నీరజ్. తనపై ఇప్పుడే బయోపిక్ వద్దని అన్నాడు. తాను మరిన్ని పతకాలు సాధించాల్సి ఉందని, ఆ తర్వాతే బయోపిక్ వస్తే హిట్టవుతుందని చెప్పాడు.
టోక్యో ఒలింపిక్స్ ట్రాక్ అండ్ ఫీల్డ్ ఈవెంట్లలో పసిడి సాధించి 100 ఏళ్ల భారత్ కలను నెరవేర్చాడు నీరజ్. నాటి నుంచి అతడిపై బయోపిక్ రానుందని ఊహాగానాలు వెలువడ్డాయి. దీనిపై స్పందించిన నీరజ్ తనకు క్రీడలే ముఖ్యమన్నాడు.
దీనిపై నీరజ్ స్పందిస్తూ..బయోపిక్ల కోసం నన్ను సంప్రదించారు. అయితే నేను సాధించినదానికి ఇది ఆరంభం మాత్రమే. ఇది ఇంకా నా తొలి ఒలింపిక్స్. నేను మరిన్ని పతకాలు సాధించాలి. సినిమా ఫ్లాప్ అవ్వాలని నాకు లేదు. ఎక్కువ మెడల్స్ సాధిస్తే..సినిమా కూడా హిట్ అవుతుంది. ప్రస్తుతానికి నా దృష్టి మొత్తం క్రీడలపైనే ఉందంటూ తన అభిప్రాయాన్ని తెలిపాడు.