టీ20 ప్రపంచకప్ 2021లో టీమ్ఇండియా ఫేవరెట్ జట్టు’..టోర్నీ ఆరంభానికి ముందు ప్రతి ఒక్కరి మనసులో మాట. ‘ఈసారి ట్రోఫీ మనదే!’ రెండు వార్మప్ మ్యాచ్లు గెలవగానే మాజీలు, అభిమానులు అన్న మాటలివి. ‘ఒక్క మ్యాచ్ ఓడినంత మాత్రాన ఏం కాదు. భారత్ బలంగా పుంజుకోగలదు’.. తొలి మ్యాచ్లో పాక్పై ఓడిన తర్వాత వచ్చిన కామెంట్లివి..అయితే కొద్దిరోజుల సమయంలోనే అంతా మారిపోయింది.
రెండేళ్లుగా ఎంతో పట్టుదల, కసితో కనిపిస్తోన్న కోహ్లీసేన మెగాటోర్నీలో మాత్రం చేతులెత్తేస్తోంది. మొదటి మ్యాచ్లో పాకిస్థాన్ చేతిలో చిత్తయిన భారత్.. రెండో మ్యాచ్లో న్యూజిలాండ్ పై ఘోరంగా ఓడిపోయింది. దీంతో ఈ టోర్నీలో సెమీస్ చేరే అవకాశాన్ని దాదాపు చేజార్చుకుంది. అయితే సెమీస్ చేరాలంటే ఓ అవకాశం మాత్రం ఉంది. అదెలాగంటే..
టీమ్ఇండియా తొలి మ్యాచ్లోనే పాక్ చేతిలో ఓడిపోయింది. కివీస్తో మ్యాచ్లో అయినా గెలిచి సెమీస్ రేసులో ఉంటుందనుకుంటే అక్కడా నిరాశే ఎదురైంది. ఇక మన జట్టు అఫ్గానిస్థాన్, స్కాట్లాండ్, నమీబియాతో మ్యాచ్లు ఆడాల్సి ఉంది. ఈ మూడింటిలో బారత్ గెలిచే అవకాశం ఉంది. ఇప్పటికే ఆడిన మూడు మ్యాచ్ల్లో విజయాలతో పాక్ సెమీస్ చేరినట్లే.
ఇక మనలాగే మూడు చిన్న జట్లతో మ్యాచ్లు ఆడాల్సిన కివీస్..వాటిల్లో గెలిస్తే నాకౌట్కు వెళుతుంది. అఫ్గాన్ ప్రమాదకరమైన జట్టు కాబట్టి..ఒకవేళ అఫ్గాన్ చేతిలో న్యూజిలాండ్ ఓడితే అప్పుడు మనకు అవకాశం ఉంటుంది. అలా జరగాలంటే న్యూజిలాండ్ను అఫ్గానిస్థాన్ తక్కువ తేడాతో ఓడించాలి. అలాగే అఫ్గానిస్థాన్పై భారత్ భారీ తేడాతో గెలవాలి. దీంతో మెరుగైన రన్రేట్ కారణంగా కోహ్లీసేన సెమీస్ చేరుతుంది.