Kalki 2898 AD | ‘షారుఖ్ ఖాన్’ ఇది పరిచయం అక్కర్లేని పేరు. బాలీవుడ్‌కా బాద్‌షా అని అభిమానులు ముద్దుగా పిలుచుకుంటారు. అంతేకాకుండా బాలీవుడ్‌లో అత్యధిక రికార్డులు ఉన్న హీరో కూడా షారుఖ్ ఖానే. తాజా షారుఖ్ రికార్డునే బ్రేక్ చేశాడు మన ‘భైరవ’. అదేనండి రెబల్ స్టార్ ప్రభాస్. ‘బాహుబలి’ సినిమాతో ప్రపంచమంతా రికార్డులు సాధించడంలో తన పేరు రీసౌండ్ వచ్చేలా చేస్తున్నాడు. తన తాజా సినిమా ‘కల్కి 2898 ఏడీ’ సినిమాతో ప్రభాస్.. రికార్డుల సునామీ సృష్టిస్తున్నాడు. రిలీజ్‌కు ముందు నుంచే మొదలైన ఈ సునామీకి షారుఖ్ కూడా నిలబడలేక పోయాడు. ఎంతో కాలంగా షారుఖ్ పేరుపై ఉన్న రికార్డును బ్రేక్ చేసి అందరిచేత ‘ఏదేంది బుజ్జి’ అనిపిస్తున్నాడు. మరి ఇంతకీ ఏం రికార్డు బ్రేక్ చేశాడో తెలుసా.
బుక్ మై షోలో అత్యధిక టికెట్లు బుక్ అయిన సినిమాగా షారుఖ్ ఖాన్ సినిమా ‘జవాన్(Jawan)’ ఉంది. జవాన్ తర్వాత ఎన్నో సినిమాలు రిలీజ్ అయినా ఈ రికార్డును బ్రేక్ చేయడం కాదు కదా.. దగ్గరకు చేరడం కూడా అసాధ్యంలా చూశాయి. జవాన్ సినిమాకు 12.01 మిలియన్ టికెట్లు బుక్ అయ్యాయి. అయితే తాజాగా ఈ రికార్డును ప్రభాస్ అధిగమించాడు. బుక్ మై షోలో ప్రభాస్ ‘కల్కి(Kalki)’ సినిమా ఇప్పటి వరకు 12.15 మిలియన్లకు పైగానే టికెట్ల బుకింగ్ అందుకుంది. దీంతో బాలీవుడ్ కా బాద్‌షా రికార్డును కూడా మన భైరవా బాదుషాలా నమిలేశాడంటూ అభిమానులు సోషల్ మీడియాలో పోస్ట్‌ల వర్షం కురిపిస్తున్నారు. మరి ప్రభాస్ ‘కల్కి’ ఇంకెన్ని రికార్డులు బ్రేక్ చేస్తుందో చూడాలి.
